ამერიკული ოცნებისთვის
23 იანვარი, 2016
ამერიკული ოცნებისთვის ელფოსტაბეჭდვა FaceBook Twitter
1776 წლის 4 ივლისიდან ყოველ წელს ამერიკელები დამოუკიდებლობას ზეიმობენ.

1997 წლის 4 ივლისიდან კი ყანჩაველების ოჯახში ამ დღეს გოგოს დაბადებას ზეიმობენ. ქართველი გოგოსი გულში ამერიკული ოცნებით.

ბავშვობაში ცელქი არ ყოფილა. არც მეზობლებს აწუხებდა ღიღინით მანამ, სანამ ტელევიზიით ნანახმა მუსიკალურმა ვიდეოებმა გონებაში "ოცნების" წითელი ღილაკი არ გაუაქტიურა. მას შემდეგ მღერის ყველგან და ყოველთვის. უყვარს ბიონსე - ზემოთ აღნიშნული ვიდეოების მთავარი მოქმედი პირი, შთაგონების წყარო და წარმატების მოტივაცია, ვისთანაც თავს ხშირად აიგივებს. ამბობს, რომ მასაც ჰქონდა ოცნება, გამხდარიყო მსოფლიოში აღიარებული მომღერალი, ოცნებები კი ხშირად დაუღალავი შრომის ფასად ხდება.

მსოფლიო ვარსკვლავობამდე ჯერ შორი გზაა, თუმცა, ჩვენს ქვეყანაში ეკას უკვე კარგად სცნობენ. თავდაპირველად საზოგადოების ყურადღება გარეგნობით მიიქცია, როცა სოციალურ ქსელში მისი ფოტოები გავრცელდა. მისი თქმით, ყველა თინეიჯერი გოგოს ცხოვრებაში არის ეტაპი, როცა ის საკუთარი ფოტოების გამოქვეყნების სიხშირით გამოირჩევა. თუმცა, ფაქტია ყველა გოგონას ფოტო ვერ იმსახურებს ათასობით მოწონებას ეკას მსგავსად.

პოპულარობის ახალი ეტაპი მისმა მხიარულმა ვიდეოებმა გამოიწვია. "ვიდეოების ატვირთვა, უბრალოდ, გასართობად დავიწყე. ხალხის დადებითმა რეაქციამ კი თან გამაკვირვა, თან გამახარა" - ამბობს ეკა ყანჩაველი. ამჟამად მის ფეისბუქ გვერდს 51 000 გამომწერი, მის ვიდეოებს კი ათასობით ნახვა აქვს.

ინტერვიუს დროს მასთან უცნობი გოგონა მოდის, გულთბილად მოიკითხავს. ამბობს, რომ ძალიან უყვარს და გულშემატკივრობს. როგორც ირკვევა, ასეთი შემთხვევები ხშირია ქუჩასა თუ უნივერსიტეტში, რაც მისთვის განსაკუთრებით სასიამოვნო და სასიხარულოა.

რეალურ ცხოვრებაში მხიარული, უშუალო თინეიჯერი გოგონაა, გამორჩეული მიზნებითა და ოცნებებით. ამბობს, რომ საკუთარი თავი ბანალური, რუტინული ცხოვრების წესში ვერ წარმოუდგენია. მისი გონება მთლიანად მუსიკას, გული კი ამერიკულ ოცნებას აქვს ოკუპირებული. მიუხედავად ნულოვანი მუსიკალური განათლებისა, აქტიურად ცდილობს მელოდიისა და სიმღერის ტექსტების შექმნას. მუსიკალურ პროექტ "ახალ ხმაშიც" მონაწილეობა სწორედ პროფესიული განვითარების მოლოდინით მიიღო. რინგის ტურიდან თამაშს გამოეთიშა, თუმცა ეს ტრაგედად სულაც არ აღუქვამს. "წარუმატებლობა პირადად ჩემთვის ძალიან დიდი სტიმულია. საკუთარი თავის განვითარებისა და გაზრდის მოტივაციას მაძლევს" - ამბობს ეკა.

ახალი გამოწვევა კი ახალ ადამიანებთან არის დაკავშირებული. განსხვავებული ბუნების პიროვნებებთან ურთიერთობა მისთვის საინტერესო და სასურველია. თითოეული ადამიანი მასში განსხვავებულ ადგილს იკავებს, თუმცა, სხვადასხვა მიზეზის გამო ხშირად ენაცვლებიან ერთმანეთს. უცვლელი მხოლოდ ოჯახის სივრცე რჩება. ფიქრობს, რომ არა ოჯახური იდილია, შესაძლოა, მისი ცხოვრება სხვანაირად წარმართულიყო. მშობლებმა ყველა პირობა შეუქმნეს, რათა მისი გონება არა ყოველდღიურ პრობლემაზე ან საზრუნავზე, არამედ ხელოვნებასა და სულიერ საზრდოზე ყოფილიყო ორიენტირებული.

17 წლის ჩიკო სახლის ერთ-ერთი ბინადარი და მისი კარგი მეგობარია. ძაღლი, რომელიც ეკასთან ერთად გაიზარდა. მიიჩნევს, რომ სწორედ მის გამო უყვარს ცხოველები და ყველა სულიერი არსებისადმი ჰუმანური დამოკიდებულება მისგან ისწავლა. უკვე მოასწრო სახლში ზაზუნის, თუთიყიშის, ზღვის გოჭის, კუსა და არაერთი ცხოველის დაბინავება.

კარიერულ გეგმებზე საუბრისას მის სახეზე ნათლად იკითხება ოცნება, რის მისაღწევადაც შრომას არ დაზარდება. მიიჩნევს, რომ შემდგარი მომღერლისათვის მხოლოდ ძლიერი ვოკალი არაფერს წყვეტს: "ტიპაჟი უნდა იყო, საკუთარი სტილი გაგაჩნდეს, პლასტიკა და იცოდე, რას მღერი". სურს, რომ მსოფლიომდე ქართული ხმა მიიტანოს, თავისი სიმღერითა და კარიერით არა მხოლოდ მან, არამედ ქვეყანამაც იამაყოს, რადგან ამერიკა მისთვის არის სამშობლო, მხოლოდ მეორე, საქართველოს შემდეგ. იცის, რომ ხმის მსოფლიომდე მიწვდენა რთული საქმეა, მაგრამ მოტივაცია და მონდომება წარმატების გასაღებია.










სხვა სტატიები
 „რაც უნდა მოხდეს, მაინც დავხატავ...“
19 ოქტომბერი, 2014
“ბავშვობაში მინდოდა, რომ ზოოპარკის მეპატრონე ვყოფილიყავი, ზოოპარკში დამლაგებლად ან ცხოველების მომვლელადაც კი მსურდა მუშაობა, ცხოველები მიყვარდა ძალიან, სწორედ ამიტომ სახლში მქონდა „ზოოპარკი“: რაც კი შინაური ცხოველი არსებობს, მგონი, ყველა მყავდა. მე კიდევ ყოველთვის მინდოდა ცხენი მყოლოდა, ეს ცხოველი განსაკუთრებულად მიყვარდა“.
ხატვა ბავშვობიდან დაიწყო და თავიდან ყველაზე ხშირად სწორედ ცხენებს ხატავდა, ახლა უფრო ხშირად ადამიანებს ხატავს, იზიდავს შიშველი ფიგურა, მაგრამ ბოლო პერიოდში უფრო მეტ ყურადღებასა და დროს რელიგიურ თემებს უთმობს.
ახალგაზრდა კალიგრაფი და ხელით წერის უძველესი ტრადიცია
04 ოქტომბერი, 2014
ახალგაზრდა კალიგრაფი, ხელოვნების მეცნიერებათა აკადემიის წევრი, პედაგოგი, საქართველოს ტექნიკური უნივერსიტეტის არქიტექტურის ურბანისტიკისა და დიზაინის ფაკულტეტის მესამე კურსის სტუდენტი ოთარ მჭედლიშვილი საქართველოში ერთ-ერთია, ვინც ხელით წერის უძველეს ტრადიციას იზიარებს. იგი საკუთარ ნამუშევრებს ხბოს ტყავზე, ეტრატზე, ქმნის, საწერად ლერწმის კალამსა და ბატის ფრთას იყენებს, ხოლო, რაც შეეხება მის მთავარ ნიშას, რაც სხვებისაგან გამოარჩევს, სწორედ რომ საწერი მასალა და გოთიკური სტილია.
ახალი რუსული გზა „მგზავრებისთვის“
20 სექტემბერი, 2014
ჯგუფი ,,მგზავრების” პროდიუსერი ჯგუფის ისტორიაზე, საქმიანობაზე, ქართველ და უცხოელ მსმენელზე საუბრობს.
,,როცა ადამიანი ნიჭიერია და თვითონვე ქმნის თავისსავე შესასრულებელ კომპოზიციას, მაშინ ყველაფერი უფრო მარტივადაა, ვინაიდან ის გრძნობს პულსაციას, თუ რა სჭირდება ბაზარს, ეს არის ძირითადი კოზირი, რაზეც დგას წარმატების თემატიკა”- ოთარ ედიშერაშვილი.
ინგა ბატატუნაშვილის საღებავები, ტილოები და ფუნჯები
12 ივლისი, 2014
შეხვედრა „დელისის“ მეტროსთან დავნიშნეთ. ინგა ბატატუნაშვილი მხატვარია. მეგობარ მხატვარ სოსო ქუმსიაშვილთან ერთად მხვდება. ცოტა ხანში მიხვეულ-მოხვეული გზებით მივიკვლევთ გზას კორპუსებს შორის. „ხომ კარგია, რომ ერთად მოვდივართ, მარტო ვერ მოაგნებდი ამ ადგილს“ - მეუბნება გზადაგზა. კიბეებზე ავდივართ. ოთახებიდან ადამიანები იხედებიან, ინგას ესალმებიან და მოიკითხავენ. უკვე წარმოვიდგინე, როგორია მისი სახელოსნო. ბოქლომს ხსნის, რკინის კარს აღებს და იმწამსვე საღებავების სუნს ვგრძნობ. ნათელი ოთახია სამი კედლის გასწვრივ, პირუკუ ალაგია ნახატები, მეოთხე კედელში ჩასმულ ორ ფანჯარაზე შინდისფერი და მოყვითალო ფარდები გადაწეულია და სინათლე შემოდის. ფანჯრების რაფებზე, ოთახის კუთხეებში, კედლებთან, ფუნჯები, საღებავები და ათასი სხვა ნივთი ალაგია, რომელთა უმეტესობის დანიშნულებას, ალბათ, მხოლოდ მხატვრები თუ მიხვდებიან.

Carpet Cleaning Calgary