კავკასიოლოგიის სპეციალობის სტუდენტებში დიდხანს არსებობდა იდეა, შეექმნათ ახალგაზრდული გაერთიანება, რომელიც რეალურად იმუშავებდა, როგორც არასამთავრობო, არაკომერციული საზოგადოებრივი ორგანიზაცია. 2012 წლის შემოდგომის სემესტრში კი იდეა განახორციელეს. დაარსდა "კავკასიური ლიგა". მისი ხელმძღვანელის ნოდარ თოთაძის თქმით, სტუდენტები კარგად აცნობიერებენ ახალგაზრდა თაობის როლს თანამედროვე ქვეყნის ცხოვრებაში და სურთ, წვლილი შეიტანონ მის განვითარებაში. სტუდენტების აზრით, ჯანსაღად მოაზროვნე მომავალი თაობა აქტიურად უნდა იყოს ჩართული საზოგადოებრივ ცხოვრებაში. მითუმეტეს პოლიეთნიკური და პოლიკონფესიური კავკასიის ახალგაზრდობის როლი დიდი უნდა იყოს სამოქალაქო საზოგადოების მშენებლობასა და ინტეგრაციის პროცესებში. "ვამბობ "უნდა იყოს-მეთქი", რადგანაც რეალურად დღეს ასე არ არის. თუნდაც, თბილისის სახელმწიფო უნივერსიტეტში, რომელიც ყოველთვის იყო სამოქალაქო აქტივობის ცენტრი, სტუდენტთა სამოქალაქო აქტივობა საკმაოდ დაბალია. ეს განსაკუთრებით უნდა ითქვას ჰუმანიტარულ მეცნიერებათა ფაკულტეტის შესახებ" - აცხადებს ნოდარ თოთაძე.
მაშინ, როდესაც ნოდარ თოთაძემ იდეები გაუზიარა სტუდენტებს და მათი ხედვა საერთო აღმოჩნდა რეგიონში მიმდინარე პროცესების შესახებ, დაიწყეს ფიქრი, რისი გაკეთება შეიძლებოდა და ზოგადად, რა სურდათ.
სტუდენტებს მიაჩნიათ, რომ სახელი "კავკასიური ლიგა" ზუსტად გამოხატავს გაერთიანების მიზნებს. მათ სურთ, ერთ გაერთიანებაში, "კავკასიურ ლიგაში", მოაქციონ ძალიან აქტიური, მომავალზე ორიენტირებული კავკასიელი სტუდენტები, შექმნან საერთო კავკასიური ახალგაზრდული ხაზი; საქართველოში მცხოვრები ეთნიკური უმცირესობები ჩართონ სოციალურ ცხოვრებაში სხვა კავკასიელ ახალგაზრდებთან ერთად. "კავკასიური ლიგის" ხელმძღვანელი ნოდარ თოთაძე აქვე აღნიშნავს, რომ ისინი ხელმძღვანელობენ ივანე ჯავახიშვილისა და არნოლდ ჩიქობავას კონცეფციით.
კავკასიური ლიგის მისია ასეთია: ახალგაზრდების დაინტერესება კავკასიის რეგიონით; კავკასიის ხალხთა კულტურისა და ისტორიის, კავკასიური ცივილიზაციისათვის დამახასიათებელი ფასეულობებისა და ღირებულებების, კავკასიოლოგიის, როგორც სპეციალობის პოპულარიზაცია; ლიგის წევრები გეგმავენ მოსწავლეებისა და სტუდენტების ჩართვას შემეცნებით, საგანმანათლებლო და სამეცნიერო საქმიანობაში; შიდა სახელმწიფოებრივი, რეგიონული და საერთაშორისო მასშტაბის კონფერენციების, სემინარების, დებატებისა და შეხვედრების გამართვას; გაერთიანება კავკასიელი ახალგაზრდების მონაწილეობით მოაწყობს კულტურულ და სპორტულ ღონისძიებებს.
სტუნედენტებისთვის მნიშვნელოვანია კავკასიელ ხალხებში სამოქალაქო ცნობიერების ამაღლება და ხალხებს შორის ინტეგრაციისა და სოციალურად გააქტიურების პროცესისთვის ხელშეწყობა.
"კავკასიური ლიგა" ამ წლიდან იწყებს პირველი მნიშვნელოვანი ნაბიჯების გადადგმას იმ სფეროში, რასაც ახალგაზრდული საქმიანობა ჰქვია.
2012 წლის შემოდგომის სემესტრში ჩატარებული მოკრძალებული ღონისძიებების შემდეგ სტუდენტები იმუშავებენ რამდენიმე მნიშვნელოვან, ღირებულ და ხარისხიან პროექტზე, რომელიც მზად გაზაფხულის სემესტრში იქნება. ამასთანავე, მზად არიან ითანამშრომლონ ყველა ორგანიზაციასთან, რომლებიც მსგავს ინტერესებსა და ხედვას იზიარებენ.
