შეხვედრაზე განსაკუთრებული ყურადღება დაეთმო იმ პროგრამებს, რომლებზეც საბუთების მიღება მთელი საქართველოს მასშტაბით უკვე დაიწყო. პრეზენტაციის გამართვა ემსახურებოდა ქართველი სტუდენტებისთვის ინფორმაციის მიწოდებას ,,ერასმუს მუნდუსის" სტიპენდიის მოპოვების შესახებ.

ერასმუსის სტუდენტთა ქსელის "თბილისი უნივერსალი" პრეზიდენტმა ნინო ლეჟავამ გვითხრა, რომ პროგრამა ერთ-ერთი უმნიშვნელოვანესია, რომელსაც ევროკავშირი ახორციელებს და რომელსაც საკმაოდ დიდი დაფინანსება აქვს: ,,ეს არ არის მხოლოდ განათლების მიღების საშუალება საზღვარგარეთ, არამედ ცნობიერების ამაღლება, ახალი მეგობრების შეძენა, კულტურულ-გაცვლითი ურთიერთობები. ჩვენი მაქსიმალურად ვცდილობთ, ჩავერთოთ საუნივერსიტეტო ცხოვრებაში, მივაწოდოთ სასარგებლო ინფორმაცია სტუდენტებს".

შეხვედრის ორგანიზატორებმა პრეზენტაციის დროს სტუდენტებს განუმარტეს, რომ ,,ერასმუს მუნდუსი" სულ 18 პროგრამას მოიცავს, თითქმის ყველა მათგანის სასტიპენდიო თანხა მოიცავს 1000 ევროს საბაკალავრო პროგრამაზე, ხოლო 1500 ევროს სამაგისტო პროგრამაზე. სტუდენტებმა ასევე მიიღეს ინფორმაცია სამიზნე ჯგუფებისა და პარტნიორი უნივერსიტეტების შესახებ.

შეხვედრას ესწრებოდა საქართველოში აკრედიტებული სხვადასხვა უმაღლესი სასწავლებლის აკადემიური პერსონალი და ევროკავშირის მისიის წარმომადგენელი ოლივერ რაისნერი.

პრეზენტაციაზე მოწვეულნი იყვნენ საქართველოში გაცვლითი პროგრამით მყოფი უცხოელი სტუდენტები, რომლებმაც თავიანთი გამოცდილება და შთაბეჭდილება გაუზიარეს ქართველ ახალგაზრდებს.