საქართველოს განათლებისა და მეცნიერების სამინისტროში ″განსაკუთრებით ნიჭიერი ბავშვებისა და ახალგაზრდების მხარდაჭერის პროგრამის" ფარგლებში წარჩინებულ კურსდამთავრებულებს ოქროსა და ვერცხლის მედლები გადაეცათ.
″დღეს ვაჯილდოებთ სკოლის მოსწავლეებს, რომლებმაც წარჩინებით დაამთავრეს საშუალო სკოლა. გვყავს ძალიან ბევრი ოქროსმედალოსანი და ასევე ვერცხლისმედალოსნები. ჩვენ ვულოცავთ მათ და წარმატებებს ვუსურვებთ″ - განაცხადა საქართველოს განათლებისა და მეცნიერების მინისტრმა თამარ სანიკიძემ.
მედალოსან კანდიდატთა შერჩევის კრიტერიუმები ეროვნული სასწავლო გეგმით რეგულირდება და მედალზე სახელისა და გვარის გარდა შესაბამისი წელია მითითებული. ორგანიზატორთა განცხადებით, პროგრამის მიზანია მოსწავლეთა აკადემიური მოსწრების წახალისება და წარჩინებულ მოსწავლეთა წარმოჩენა.