ახალ კრებულში უკვე გამოქვეყნებული და ახალი მოთხრობები შევიდა. როგორც ნინო ამბობს, თითოეული მათგანი გამოძახილია დღევანდელობაზე: ''პირველ რიგში, მინდა მადლობა გადავუხადო გამომცემლობა ''ინტელექტს'', ამ მოთხრობების თავმოყრის საშუალება რომ მომცა. ''იასამნის სეზონი'' ერთ-ერთი მოთხრობის სათაურია. თემატიკა ჩვეულებრივია - სიყვარული, თავისუფლება. საერთოდ შეუძლებელია, შემოქმედმა გვერდი აუაროს თავის დროს. ყველა შემოქმედი თავისი დროიდან გამომდინარეობს. არის თემები, რომლებიც ძალიან მტკივნეულია ჩემთვის. საბოლოო ჯამში, ისე ხდება ხოლმე, რომ ლიტერატურა უფრო მეტ სიმართლეს ამბობს, ვიდრე პოლიტიკოსები, საზოგადოება. მომავალმა თაობამ კი უნდა წაიკითხოს ლიტერატურად ქცეული სიმართლე''.

''ინტელექტის'' მთავარი რედაქტორი, ზვიად კვარაცხელია ნინოსთან თანამშრომლობით კმაყოფილია: ''ნინო სადღობელაშვილი ჩვენი გამომცემლობის ერთგული ავტორია. ჩვენ მისი ოთხი წიგნი გამოვეცით და მომავალშიც გავაგრძელებთ თანამშრომლობას. ვფიქრობ, ეს კრებული მნიშვნელოვანი შენაძენია თანამედროვე ქართული მწერლობისთვის, დიდ შთაბეჭდილებას მოახდენს ქართველ მკითხველზე თემების მრავალფეროვნებით. ნინოს აქვს თავისი სათქმელი, თემები და მხოლოდ მისთვის დამახასიათებელი ენა''.

ნინო სადღობელაშვილი ამჟამად ახალ რომანზე მუშაობს, რომელიც წლის ბოლომდე გამოიცემა.