ერევანთან ახლოს სოფელია, სადაც ნაცრისფერ სახლებს შორის ერთი შენობა თავისი სიფერადით გამოირჩევა.
მკვეთრი იისფერი და მოლურჯო-მოყვითალო სახლის შიგნითაც არანაკლები ფერადოვნებაა. ადამიანური ფერები თანდათანობით იცვლება. ამ სახლში ხშირად დიდი დარდის მატარებელი ქალები ხვდებიან, მაგრამ ეტაპობრივად მათი ცხოვრება და ხასიათი ხალისდება. ფერადი ცენტრი დედებს შიშის დაძლევაში, შშმ ბავშვების მოვლაში ეხმარება.
საქველმოქმედო ორგანიზაციას "კეთილი დედა" დაარქვეს. ცენტრის დამფუძნებლის მარინე ადულიანის თქმით, ყველაფერი იმით დაიწყო, რომ მან მშობლებისგან მიტოვებული პატარა იპოვა, რომელიც დედ-მამამ საავადმყოფოში ჯანმრთელობის პრობლემების გამო დატოვა. ბავშვის დახმარების სურვილმა ქალების ჯგუფი გააერთიანა და ერთი წლის შემდეგ პატარასთან მუშაობის შედეგად დედამ შვილი სახლში წაიყვანა.
პირველ წელს მოხალისეთა ჯგუფი უბრალოდ, ბავშვთა სახლებსა და საავადმყოფოებში დადიოდა, მიტოვებულ ბავშვებს პოულობდნენ, ცდილობდნენ, მათთვის ყველა საჭირო პირობა შეექმნათ, მშობლებსაც საინფორმაციო და ფსიქოლოგიურ კონსულტაციას უტარებდნენ. დღეს უკვე 8000-მდე "კეთილი დედაა" ორგანიზაციაში გაერთიანებული. მათი მთავარი მიზანია, ბავშვთა სახლის აღსაზრდელები ოჯახებში დააბრუნონ და ასევე, ცდილობენ, შემცირდეს იმ მშობელთა რიცხვი, რომლებიც ბავშვზე უარს მხოლოდ მისი შეზღუდული შესაძლებლობის გამო ამბობენ. "კეთილ დედებს" სურთ, მათი მზრუნველობის ქვეშ მყოფი პატარები საზოგადოების სრულფასოვანი წევრები გახდნენ.
სწორედ სპონსორებისა და საზოგადოების მხარდაჭერით მარინე ადულიანმა ცენტრი სახელად "კეთილი სახლი" ააშენა და ორგანიზაციის მანდატი გააფართოვა. " კეთილი სახლი" ორი შენობისგან შედგება: პირველი არის თერაპული ცენტრი და თავშესაფარი დედებისთვის, რომლებსაც არ სურთ შვილების დატოვება; მეორე შენობაში კი ბავშვები არიან, რომლებმაც დატოვეს ბავშვთა თავშესაფრები, ისინი ამ შენობაში იცხოვრებენ. ასევე, აქ არის ღონისძიებების პლატფორმა, სადაც შესაძლებელია, საბავშვო ზეიმების მოწყობა ქველმოქმედების გასაღებად.
ბევრმა შეიძლება არც იცოდეს რა ჰქვია, მარინე ადულიანი სახეზე ვერ იცნონ, მაგრამ საზოგადოებაში ცხოვრება უფრო მარტივია, როცა იცი, რომ მისი წარმომადგენელია ისეთი მზრუნველი დედა, კეთილი ქალი და კარგი მოქალაქე, რომელიც საუბრობს ტაბუირებულ თემებზე და სამყაროს უკეთესობისკენ ცვლის.
პროექტს "ჟურნალისტები სამხრეთ კავკასიიდან" თავისუფალი ასოციაცია ახორციელებს. მასალებში გამოთქმული შეხედულებები შესაძლოა, განმახორციელებელი ორგანიზაციისა და დონორის მოსაზრებებს ყოველთვის არ ემთხვეოდეს.
